2007年5月27日星期日

咁?我化唔化呀?



大家睇雜誌呀,週刋呀,成日都有記者影到D演員藝人冇化粧個樣,平時有D手下留情嘅,就話'清新脫俗','天生麗質' 嘅字眼 ,如果咁唔好彩,嗰個編輯じ情唔好再加十萬個客觀環境因素,佢落筆寫嘅時候就會用 '嚇死街彷' 呢D驚嚇字眼!或者喺一大堆相度,唔知點解佢就係鍾意揀一張你半開半閉眼,寧舍樣衰嘅一張嚟登,配合佢D字眼,咁你重唔係樣衰??

咁有陣時我地真係唔想化粧架,但因為平時日化夜化,仲要長時間用粉蓋住塊臉,到休息唔駛開工,真係唔想再用化品啦!不過係我地捱得多通宵拍劇,D黑眼圈一定唔少得!唔夠瞓咪皮膚又黃又乾!出多D外景曬下係人都出雀班啦!

好啦我地想俾皮膚休息下,唔化....................一日咁多吖....!

點知我地一出街,就俾人見到......................唉!

如果唔化戴個大黑太陽眼鏡...又話我扮野......

咁...........?繼續化..............等D皮膚冇得休息.........................咪又死!
報導會直接間接地幫我地提高咗知名度,等本來唔識我地嘅觀眾都會喺呢兩日認識我地!
雖然過幾日大家可能都會唔記得,不過祇要我地俾心機,繼續樣衰,咁都仲有機會架!希望在明天呀嘛!
不過返到屋企,連阿媽都問我...
"阿女,你做セ咁樣衰呀,真喺失禮架嘛!"
...........................................uh!
2007 copyright 陳靖允 /陳迪華 /siana

女演員_化粧前後



女演員嘅化粧前後,有時又真係好似 變臉 架!
記得有一次我地朝早05通告化粧,我化化下有一個女仔行入化粧間,同我呀同我地D化粧師、梳頭(古裝)師父打招呼,然後係化粧間角落坐低,當時我唔知佢係邊個,但係人地同我打招呼咁我禮貌上都 say 個 hello 嘛!
跟住過咗一個鐘,我化好粧梳完頭,劇務己經準備集合演員出發,嗰日都好多演員,所以化粧間好熱鬧,其間劇務大聲問 ' 有冇見到xxx?' 'xxx返嚟未?'
大家都答'冇見到','唔覺喎' ,終於到我地好多人都化好梳好頭,去餐廳食早餐等出發啦,等下等又過咗一個鐘,大家都開始好唔耐煩,劇務好忙咁穿梭化粧間、服裝間,都話揾xxx唔到,但係xxx又留咗台話佢喺公司噃,正當大家都好奇怪嘅時候,xxx突然喺餐廳出現,咦!見佢身上件衫,咪就係今朝同大家打招呼嗰個?但係點解唔同咗樣嘅?
我係話 '完全' 兩個樣咁喎?
有D男同事己經好激氣要等咁耐咪多口問佢,你話你好早返嚟架?做セ劇務打鑼揾你又唔應,化粧化2個幾鐘你化乜野呀?( 其實個心都唔係好信今朝見嗰個真係而家眼前呢個 )
xxx : 係呀,05通告嘛!今朝你地見到我架,你地有同我講早晨架?(佢一面誠意喎,唔似講大話吖 )
( 暗地大家其實都唔知嗰個係佢 )
咁做セ劇務猛揾你,你都唔應人呀?
xxx : 咁你聴到劇務揾我,你又唔話佢聴?
(咦,再講落去,好似係我地唔啱喎?)
從呢件事之後,醒目嘅 PA 發通告前會多口問多句 : ' 請問x姐你化粧要化幾耐?'
事件當時成為ATV化粧間經典,大家仲去分折一個人塊臉如果要化2個鐘,咁打底粉用15分鐘、做陰影用15分、胭脂15分、上乾粉定型15分,咁1個鐘做晒基本粧,下一個鐘就用15分去劃眉、每一隻眼用15分,最後祇係剩番15分去塗唇膏,老實講,其實真係好趕,要每一步都唔好錯,如果唔係2個鐘點夠化一個粧呀?
xxx真係好專業,化個粧出嚟仲要完全唔同自己個樣,呢下先至係掂吖嘛!我地真係唔識野!
嘻..你係咪好想知呢個化左2個鐘頭,由冇變有嘅女演員係邊位呢?
2007 copyright陳靖允 / 陳迪華 / siana